Almenna tunnilsloysnin er tann besta

Felagið sigur, at munurin millum almennu loysnina og privatu loysnina er fíggingin og kravið um avkast. Tí tey avgera bummgjaldið.

Sambært viðmerkingunum til lógaruppskotið hjá tingfólkunum báðum tykist henda loysnin hava eitt betri samfelagsbúskaparligt úrslit, tí bummgjaldið sum skilst verður nógv minni enn í privatu loysnini.

Kunnu spara 15 milliónir árliga
Vinnulívið fer at spara 15 mió. kr. um árið í bummgjøldum, sigur Føroya Arbeiðsgevarafelag. Felagið ger tó vart við, at tað hevur ikki eftirkannað, um útrokningarnar í lógaruppskotinum eru eftirfarandi.

Føroya Arbeiðsgevarafelag ivast tó í, um tað er rætt at tengja Eysturoyartunnilin og Sandoyartunnilin saman. Felagið sigur, at sama, hvussu víkur og vendir er avgerandi, at Eysturoyartunnilin verður gjørdur.

Bæði uppskotini mugu viðgerast
Føroya Arbeiðsgevarafelag mælir tí til, at bæði lógaruppskotini verða viðgjørd saman í løgtinginum, so annað uppskotið ikki verður vrakað, uttan at hitt samstundis verður samtykt.

Arbeiðsgevarafelagið hevur ikki fingið lógaruppskotið hjá Kári P. Højgaard, landsstýrismanni, um privatu loysnina til hoyringar.