Politiið flýggjar aftur undan blámusoppi

Politiið í Havn noyðist enn einaferð at flýggja undan blámusoppi.

Seinasta kanningin, sum varð tikin av inniluftini á politistøðini Yviri við Strond fyrst í juli, staðfesti, at blámusoppur enn er í nøkrum hølum. Síðani hevur politiið havt samráðingar við útleigaran, sum tey leiga hølini frá, um at finna eina loysn, men nú hevur politiið  gjørt av, at finna aðra loysn.

Fluttu úr Jónas Broncksgøtu

Politiið flutti annars úr hølunum í Jónas Broncksgøtu í hølini Yviri við Strond tíðliga í 2011, tí blámusoppur varð staðfestur í bygninginum í Jónas Broncksgøtu. Politiið hevur ikki funnið hóskandi høli enn, og sigur, at tað kann verða trupult at finna høli í Havn, sum hóska til politistøð.

Tí kann verða talan um, at fyribilshøli verða sett upp til politistøðina at húsast í.