Løgtingið skal vera pappírsleyst

Øll tingfólk skulu nú hava teldil. Hetta er ein liður í arbeiðinum at gera løgtingið pappírsleyst.

Formansskapurin hevur fund fyrrapartin týdagin, og eitt av evnunum á fundinum er "Reglugerð í sambandi við pappírsleyst løgting".

Jógvan á Lakjuni, tingformaður, sigur við tíðindaportalin in.fo, at ein partur av hesum er, at øll tingfólk í næstum fáa útflýggjað hvør sín teldil, sum eftir ætlan skal avloysa ein stóran part av pappírinum, ið verður brúkt í tingarbeiðinum.

Pappírsnýtslan minkar

- Hetta er ikki nakað eindømi, og eitt nú havi eg skilt, at á Christiansborg hava tey spart úti við helmingin av pappírsnýtsluni, síðani tey fóru at nýta teldlar í tingarbeiðinum. Her heima hava vit havt ein bólk við eini 4-5 tingfólkum, sum saman við umsitingini hava gjørt royndir, og nú er tíðin komin til at víðka hetta, so tað fevnir um alt løgtingið, sigur løgtingsformaðurin við in.fo .

Tingformaðurin sigur, at tað ber ikki til at noyða tingfólk at brúka teldil, og tey, sum vilja hava pappí,r fáa tað.

Tað kann væl hugsast, at meðan yngri tingfólk skjótt taka við hesum, so eru vit kanska nøkur eldri, sum ikki eru eins skjót at venja. Og krevur eitt tingfólk at hava pappír at lesa og arbeiða við, so kann hetta sjálvandi ikki noktast, sigur Jógvan á Lakjuni, tingformaður.