Fíggjarlógin liðug

Løgtingsskrivstovan fekk beint fyri midnátt, tá freistin var, uppskotið um fíggjarlóg fyri 2014. Uppskotið verður lagt fram í løgtinginum klokkan 11.00 mánadagin.

Og fyrsta viðgerð verður hósdagin og fríggjadagin í næstu viku.

Saman við fíggjarlógaruppskotinum hevur løgtingið fingið nakrar lógir, sum eru knýttar at fíggjarlógini, bæði lógir um útreiðslur og inntøkur.

Harafturat er eykajáttanarlógin fyri heystið 2013 komin í løgtingið.

Seks eykajáttanaruppskot eru annars longu komin í tingið eftir ólavsøku, fýra frá landsstýrinum, tí tey høvdu so stóran skund, at tey kundu ikki bíða til nú, og tvey frá andstøðuni.