Vilja bora fleiri tunlar

Løgtingsmenninir Páll á Reynatúgvu og Hendrik Old, vilja hava løgtingið at heita á landsstýrið, um at fara undir at fyrireika at gera tunnil til Dals, Fámjin, Gjáar og Tjørnuvíkar.

Tað gera teir í einum uppskoti til samtyktar, sum varð lagt fyri tingið í gjár.

Teir vísa á, at fyri at menna samferðslukervið, var í mong ár eitt vælvirkandi borilið hjá Landsverki, sum hevði til uppgávu at gera tunlar til mest fjarskotnu bygdirnar í Føroyum.

Seinasti tunnilin sum varð gjørdur á tann hátt, var Gásadalstunnilin.

Boriliðið varð eitt beinleiðis úrslit av grundhugburðinum aftanfyri gamla Landsverkfrøðingsstovnin, har aðalmálið var at binda bygdir saman, og at gera nøktandi farleiðir til øll búpláss í landinum.

Teir vísa á, at neyðugt er at fáa ein borivogn til vega, og teir halda tað vera hóskandi at seta 15 miljónir kr. av um árið at bora fyri.

Hendrik Old og Páll á Reynatúgvu mæla til at arbeiðið verður raðfest í eini tíðarfestari ætlan, so tey sum framvegis búgva í teimum fýra bygdunum, fáa eina grundaða vón um betri farleið í framtíðini.