Løgmaður ráðførir seg um kæru til WTO

Í dag fer Kaj Leo Holm Johannesen, løgmaður, at ráðføra seg við Uttanlandsnevndina hjá løgtinginum um ætlanina hjá landsstýrinum at kæra ES til WTO, heimshandilsfelagsskapin.

Landsstýrið ætlar við fulltrú frá Danmark, sum er limur í WTO, at kæra ES, tí ES hevur sett í gildi handilsforðingar móti Føroyum. Føroyar eru ikki sjálvstøðugur limur í WTO og noyðast tí at seta álit sítt á hjálp úr Danmark.

Í Fíggjarnevndini

Hósdagin í síðstu viku ráðførdi løgmaður seg við Fíggjarnevndina um at brúka burtur av teimum sjey milliónunum, sum eru játtaðar til at fara í altjóða gerðarrætt við ES, til eisini at kæra ES til WTO.

Harafturat skulu pengarnir býtast millum ár, tí tvey ella trý ár kunnu ganga, áðrenn avgerðir fáast frá gerðarrættinum og WTO.