Innbrotini fækkað seinastu árini

Færri fráboðanir eru um innbrot í dag enn fyri 18 árum síðani. Tað vísa tøl frá Hagstovuni.

Ein orsøk kann vera, at færri handlar liggja inni við reiðum peningi í dag, heldur Bergleif Brimvík, leiðari á kriminaldeildini hjá Politiinum.

Í yvirlitinum frá Hagstovuni sæst, at 142 fráboðanir um innbrot vóru í 1995, meðan bert 40 fráboðanir um innbrot vóru í 2012.

Yvirlitið vísir, at fráboðaninar eru støðugt fækkaðar síðani í 1995.

Bergleif Brimvík leiðari á kriminaldeildini hjá politinum sigur, at tað er torført at siga við vissu, hví færri fráboðanir eru um innbrot nú, enn fyri nøkrum árum síðani.

Hann heldur eina orsøk vera, at færri handlar liggja inni við nógvum reiðum peningi í dag enn fyri nøkrum árum síðani, tí fleiri nýta kort at gjalda við.

Innbrot verða ofta framd fyri at fáa hendur á reiðan pening, millum annað til rúsevni, og tí er tað kanska minni áhugavert at bróta inn í handlar, um ongin reiður peningur er at fáa hendur á.

Eisini vísur Bergleif Brimvík á, at politiið seinastu árini hevur gjørt nógv við at greiða skúlabørnum frá, hvørjar fylgir tað kann hava, um revsiváttanin ikki er rein.

Og hetta kann eisini verða ein orsøk til, at færri bróta inn í dag.

Bergleif Brimvík sigur eisini, at politiið hevur fingið betri útgerð til at greiða mál, enn fyri nøkrum árum síðani.

DNA-royndir gera tað millum annað lættari at finna innbrotsfólkini, sigur hann.