Fríhandilssáttmáli við Kasakstan

Mánadagin fara løgmaður og embætisfólk til Kasakstan at samráðast um at fáa ein fríhandilssáttmála í lag.

Russland er í tollsamgongu við m.a. Kasakstan, og tí heldur landsstýrið, at ein avtala við Kasakstan og onnur lond har á leiðini er eitt stig fram móti at fáa fríhandilssáttmálan við Russland undir land.

Tí fara løgmaður og embætisfólk til Kasakstan at tingast um fríhandilsavtalu.

Ferðin, sum varir fimm dagar, gongur eisini til Russlands, har fundur verður í Moskva við russiska varauttanríkisráðharran, Vladimir Titov.

Løgmaður sigur, at Føroyar skulu eisini hava fríhandilsavtalur við onnur lond í tollsamgonguni, m.a. Hvíta Russland, og eisini stendur Ukraina á arbeiðsskránni hjá uttanríkistænastuni hjá løgmanni.

Tað var í fjørheyst, eftir árliga ST-aðalfundin í New York, at handilsviðurskiftini millum Føroyar og Russland komu á dagsskrá.

Tá hitti Kaj Leo Holm Johannesen russiska uttanríkisráðharran, Sergej Lavrov, og farið var undir arbeiðið at fáa í lag handilssáttmála við Russland.