Løgmansskrivstovan spyr um innlit

Við at brúka regluna í stýriskipanarlógini um eftirlit við landsstýrisfólkunum hevur Løgmansskrivstovan spurt Fíggjarmálaráðið, sum hevur arvað tunnilsmálið, hví innlit ikki verður latið í uppskotið um sáttmála millum Copenhagen Infrastructure Partners og Innlendismálaráðið.

Løgmansskrivstovan spyr, á hvønn hátt fíggjarligu áhugamálini hjá tí almenna ítøkiliga verða í vanda fyri at verða verri fyri, um sáttmálin verður almennur.

Løgmansskrivstovan spyr eisini Fíggjarmálaráðið, um tað fer at spyrja CIP, hvat í sáttmálanum, CIP heldur, at lógin verjir móti innliti.

Og Fíggjarmálaráðið er eisini spurt, um tað fer at gera eina niðurstøðu úr tí, sum CIP møguliga svarar.

Og, um Fíggjarmálaráðið ger ein samandrátt av tí, sum lógin ikki verjir móti innliti, úr svarinum hjá CIP.

Løgmansskrivstovan hevur rykt Fíggjarmálaráðið eftir svari.

Fíggjarmálaráðið svaraði týsdagin í síðstu viku, at svarið kom innan eina viku.

Í dag var svarið ikki komið.