Barnahúsið lagt fyri løgtingið

Annika Olsen, landsstýriskvinna, skjýtur upp, at Barnahúsið verður karmur um tvørfakligt samstarv millum barnaverndartænastur, løgreglu og heilsumyndugleikar í málum um kynsligan ágang og likamligan harðskap.

Hugsanin við Barnahúsinum er, at myndugleikarnir koma til barnið, heldur enn at barnið ferðast millum ymsar myndugleikar.

Barnahúsið skal verða eitt stað, har barnið og familjan kunnu fáa hjálp og stuðul, og har avhoyringar eisini verða framdar.

Eisini skal Barnahúsið samskipa læknaligu kanningarnar í málum um kynsligan ágang og likamligan harðskap.

Løgtingið hevur sett hálva millión krónur av til at skipa Barnahúsið.

10-15 mál hava verið seinastu árini, og roknað verður við, at peningurin røkkur til at seta Barnahúsið á stovn í ár og til rakstrarútreiðslur næsta ár.

Løgreglan er danskt málsøki, og Bjarne Corydon, fíggjarmálaráðharri, hevur gjørt av, at stjórnin skal seta pening av til avhoyringarútgerð, tá børn verða avhoyrd í nýggja Barnahúsinum.

Sjúrður Skaale, fólkatingsmaður, reisti málið hjá donsku stjórnini í samráð við Anniku Olsen, landsstýriskvinnu.