Samstarvið skal styrkjast

Bjørt Samuelsen spyr nú løgmann, um hann umhugsar av nýggjum at seta á stovn føroyska sendistovu í Grønlandi.

Í januar í ár løgdu Tjóðveldi og Framsókn fram uppskot um at seta á stovn sendistovu í Grønlendska høvuðsstaðnum Nuuk.

Uppskotið bar ikki á mál, men í sambandi við at Aleqa Hammond hevur vitjað Føroyar, sigur løgmaður nú, at samstarvið við Grønland skal styrkast.

Okkurt slag av umboðan

Samgongan feldi uppskotið, men ásannaði tó at, at tørvur helst var á onkrum slagi av umboðan í Grønlandi.

Løgmaður sigur nú í tíðindaskrivi, at samstarvið verður styrkt, tó uttan at nevna sendistovu ella aðra umboðan, sigur Bjørt Samuelsen.

Hon spyr tí, um løgmaður hevur broytt meining og nú fer at seta á stovn eina føroyska umboðan í Grønlandi?

Tættari samstarv

Løgmaður lat hurðina standa á gloppi aftaná grønlendsku vitjanina í farnu viku.

- Fundurin í gjár er vónandi fyrsti av fleiri formligum fundum millum løgmann og landsstýrisformannin komandi árini. Føroyar og Grønland hava á fleiri økjum somu avbjóðingar, og eitt sterkari samstarv styrkir bæði londini.

Grønland er ein miðdepil í altjóða politikki, og tí vil eitt tættari samstarv lata fleiri dyr upp - ikki minst hjá okkara vinnulívi, segði Kaj Leo Holm Johannesen, løgmaður í almennari fráboðan aftaná vitjanina.