Byggja á Kambsdali seint í vár

Útbyggingin av miðnámsskúlunum á Kambsdali, sum upprunaliga skuldi kosta 22 milliónir, er nú komin upp í 31 milliónir krónur.

Bjørn Kalsø, landsstýrismaður, hevur biðið løgtingið broyta verklagslógina frá mars í fjør, so 28 milliónir, sum prísurin var vorðin tá, fer upp í 31 milliónir krónur.

Peningur varð á fyrsta sinni settur av til umbygging og útbygging á Kambsdali í fíggjarlógini í 2012.

Síðani hevur Mentamálaráðið saman við Landsverki fyrireikað verkætlanina.

Ætlanin er at fara undir byggingina seint í vár.

Tá løgtingið samtykti fíggjarlógina fyri 2014, samtykti tað eisini at lata tríggjar milliónir afturat til miðnámsskúlarnar á Kambsdali.