Avmarka váðan av peningarstovnunum

Peningastovnarnir í Føroyum kunnu gerast so stórir, at teir eru ein váði fyri samfelagið.

Tað heldur Tjóðveldi, sum hevur skotið upp, at landsstýrið skal gera lógaruppskot, ið avmarkar váðan hjá føroyska samfelagnum, tá ið ræður um útlendskt virksemi hjá føroyskum fíggingarfyritøkum.

Tjóðveldi vísir á, at bruttotjóðarúrtøkan í fjør sambært meting hjá Búskaparráðnum var 13,9 milliardir kr. Men javnin hjá størsta føroyska peningastovninum er nærum 17 milliardir kr.

- Tað er gleðiligt, at føroyskar fyritøkur menna seg bæði í Føroyum og uttanlands, men søgan vísir greitt, at sama hvørjar trygdir eru, kemur stórt trýst á landsstýrið, landskassan og skattgjaldararnar, tá bankar eru komnir í fíggjarligar trupulleikar, sigur Tjóðveldi.

Tað krevur, at samfelagið javnan og neyvt hevur eftirlit við tí váða, ið fíggjargeirin hevur fyri samfelagið.

Flokkurin heldur, at ein máti at tryggja neyvari innlit og avmarka samfelagsliga váðan er, at útlendska og føroyska bankavirksemið verður skipað í hvør sítt felag.