Landið lænir eina milliard

Løgtingið fer í dag undir at viðgera tey nógvu tingmálini, sum komu fríggjadagin. Millum málini, sum skulu viðgerast í dag, er lógin um lántøku til landskassan í 2014. Fíggjarmálaráðið biður í hesum uppskotinum um loyvi til at læna 200 milliónir, so landskassin hevur neyðuga gjaldførið í ár.   

Men í veruleikanum hevur landskassin brúk fyri 442 milliónum til bæði árini, 2013 og 2014. Sambært Fígging Landsins varð hallið í fíggjarlógini fyri 2013 góðar 170 milliónir størri enn tær stívliga 240 milliónirnar, sum standa í fíggjarlógini. Hallið í fíggjarlógini í fjør er mett at vera 415 mió. kr. Gjaldførið hjá landskassanum er tó betri enn minstakravið í lógini, sum er 15 prosent av BTÚ, bruttotjóðarúrtøkuni. Tí nýtist landskassanum ikki at læna meira enn 200 milliónir.

Gjaldstovuráðið ásetti 16.september í fjør, at landsins minsta gjaldføri í 2014 er tvær milliardir og 25 milliónir krónur, sum eru hálvthundrað milliónir meira enn í fjør.

Landið noyðist eisini at læna 650 milliónir krónur í ár til at gjalda brævalán, sum fellur til gjaldingar 7.apríl.

Minst eina millard

Tá landið tekur lán, er ráðiligt ikki at læna minni enn 1 mia. kr. í einum, sigur Fíggjarmálaráðið. Og fyri at koma upp á milliardina verða eisini læntar 150 milliónir til at gjalda aftur lán, sum fellur til gjaldingar næsta ár.

Við ársenda 2014 verður landskassans langfreistaða bruttoskuld fimm milliardir og 570 mió.kr.