Íslendski fiskimálaráðharrin vitjar í Føroyum

Seinnapartin í dag kemur íslendski fiskimálaráðharrin, Sigurður Ingi Jóhannsson, til Føroya at tosa við Jacob Vestergaard, landsstýrismann, um fiskiveiðusamstarvið millum Føroyar og Ísland.

Eingin sáttmáli um sínámillum fiskirættindi er gjørdur fyri 2014.

Vanliga plagdu londini at gera sáttmála í januar. Men avtala er tó um, at skipini kunnu fiska í ár eftir sáttmálanum, sum var í 2013, til nýggjur sáttmáli er gjørdur. Millum annað føroysku línuskipini fiska botnfisk í íslendskum sjógvi.

Íslendski fiskimálaráðharrin steðgar eitt samdøgur í Føroyum. Hann fer til Danmarkar seinnapartin í morgin.