Leggja seinastu hond á avlurtingarpakkan

Vinnunevndin fer á fund  klokkan hálgvum ellivu at leggja seinastu hond á álitið um seinasta partin av avlurtingarpakkanum. Tann partin, sum krevur, at telefyritøkurnar tøkniliga skulu kunna geva løgregluni tær upplýsingar og avlurtingar, sum henni tørvar.

Nevndin hevði fund um broytingarnar í fjarskiftislógini seint í gjárkvøldið, men tá vóru ikki allar súðir syftar.

Andstøðan mælir frá

Minnilutin, Bjørt Samuelsen, Aksel V. Johannesen og Kári P. Højgaard, mælir tinginum frá at samtykkja uppskotið og vísir m.a. til, at tað ikki er rætt at áleggja borgaranum prísin fyri tær tænastur, sum løgreglan krevur at fáa frá telefyritøkunum út frá rættargangslógini, har tann stóri avlurtingarpakkin er skipaður.

Umhugsa at útseta lógina

Hanus Samró úr Fólkaflokkinum er eisini ímóti at føroyski telekundin skal rinda við størri telefonrokningum. Hini trý í nevndini, Alfred Olsen, Bjarni Djurholm og Janus Rein, hava umhugsað at útseta, nær lógin skal koma í gildi. Fundur verður í Vinnunevndini um ein hálvan tíma, og álitið skal leggjast fram seinnapartin. Ætlanin er, at málið eisini skal hava aru viðgerð í dag.