Neystamálið í Lorvík ikki loyst enn

Málið um nýggju neystini við nýggja bátahylin í Leirvík er ikki loyst enn.

Eysturkommuna hevur gjørt nýggja byggisamtykt fyri økið, men ein slík byggisamtykt skal fyrst viðgerðast í lokalu friðingarnevndini, sum síðani sendir hana til yvirfriðingarnevndina til staðfestingar, og síðani skal hon á borðið hjá landsstýrismanninum, sum skal góðkenna byggisamtyktina.

Tá neystini vórðu bygd í fjør, var eingin byggisamtykt fyri økið, men neystini eru partur av nýggju byggisamtyktini.

Friðingarnevndin í Eysturoy tók síðani mákið til viðgerðar, men av gegnistrupulleikum hjá nevndarlimi var málið flutt til friðingarnevndina í Norðoya sýslu, og hon viðgjørdi málið hálvan september í fjør.

Hon vildi hava Eysturkommunu at taka tey fýra neystini, sum eru bygd á havnalagnum í Lorvík, niður.

Karl Johansen, sýslumaður í Norðoyggjum, sigur, at nevndin staðfesti, at bæði neyst og bátahylur eru bygd uttan loyvi, og at nevndin kravdi at kommunan tekur neystini niður, og málið er sent Yvirfriðingarnevndini.