Samfylkingin fær helst borgarstjóran í Reykjavík

Alt bendir á, at Samfylkingin fær borgarstjóran í Reykjavík eftir kommunuvalið Í Íslandi í gjár.

Samfylkingin fekk sløk 32 prosent av atkvøðunum og fimm býráðslimir valdar. Sjálvstæðisflokkurin fekk 25,7 prosent og fýra sessir, Bjørt framtíð  og Framsókn fingu tveir sessir í part, og Vinstri-grønu og Píratar fingu ein sess hvør.

Dagur B. Eggertsson, formaður í Samfylkingini í Reykjavík, fer í dag at tingast við formenninar í Bjartari framtíð, Vinstru-grønu og Píratum um samgongusamstarv.

Dagur B. Eggertsson sigur, at umleið hálvan juni verður nýggj býráðssamgonga væntandi skipað í Reykjavík.