Eitt samdøgur á intensivu kostar 24.250 kr.

Eitt samdøgur á intensivu deild í Føroyum kostar 24.250 krónur.

Neyva talið er nú komið at standa í kunngerðina um gjald fyri sjúkrahúsviðgerð. Prísurin er tó bara galdandi fyri tey, sum ikki hava rætt til ókeypis viðgerð á sjúkrahúsunum í Føroyum.

Fólk, sum búgva í Føroyum, hava rætt til ókeypis viðgerð, og eisini eitt nú ferðafólk, har avtala er við sjúkrahúsini í heimlandi teirra um, at tey rinda fyri viðgerðina, ella tá millumtjóðaavtalur ella aðrar avtalur borga fyri ókeypis viðgerð.

Onnur gjøld, sum nú eru nevnd í kunngerðini, eru 1500 krónur fyri sjúkraflutning, og fyri samskifti og samskipan við útlendsk tryggingarfeløg, arbeiðsgevarar og onnur er ómaksgjaldið 600 kr. um tíman.

Áðrenn kunngerðin varð broytt, stóð bara, at gjaldið samsvarar við útreiðslurnar, sum standast av viðgerðini.