Lættari hjá útlendingum at arbeiða á sjúkrahúsum

<p>Nú er lagaligari hjá sjúkrahúsunum í Føroyum at fáa útlendskar læknar til arbeiðis.</p>

<p>Millum tær 27 kunngerðirnar um løggildingar í heilsuverkinum, sum komu í gildi leygardagin, er ein um at løggilda læknar úr londum, sum ikki eru í ES ella EFTA. Nú er so lagaligari hjá sjúkrahúsunum at fáa læknar úr eitt nú Kanada, USA og India.</p>

<p>Fyrr skuldu læknar úr londum uttan fyri ES ella EFTA, sum komu til Føroya at arbeiða, læra danskt ella fáa undirvísing í danskari heilsulóggávu. Nú kann læknin velja, um hann fer upp til føroyska ella danska málroynd og roynd í føroyskari ella danskari heilsulóggávu.</p>

<p><strong>Trupult at taka royndir</strong></p>

<p>Landssjúkrahúsið hevur upplýst fyri Heilsumálaráðnum, at av og á hava útlendskir læknar hildið tað vera ein trupulleika at skula taka royndir í donskum máli og viðurskiftum fyri at arbeiða í Føroyum. Løggildingarlógin fyri Heilsuverkið kom í gildi í fjør heyst.</p>

<p>Sambært lógini fáa kiropraktorar, ergoterapeutar, fysioterapeutar, optikarar og heilsurøktarar løggilding. Tær 27 kunngerðirnar, sum við heimild í autorisa-tiónslógini komu í gildi leygardagin, eru í høvuðsheitum um faklig krøv til heilsu-starvsfólk, sum Ministeriet for Sundhed og Forebyggelse, Sundhedsstyrelsen ella Statens Seruminstitut varða av</p>