Mette Frederiksen verður forsætisráðharri

Fer Helle Thorning-Schmidt, forsætisráðharri, í leiðarastarv í ES, verður Mette Frederiksen forsætisráðharri. Hon er í løtuni arbeiðsmálaráðharri

Tað sigur politiski redaktørurin í danska kringvarpinum, Uffe Tang.

Hann sigur, at sosialdemokratiski flokkurin hevur longu lagt ætlan fyri, hvat skal henda, um Helle Thorning-Schmidt fer til Brússel.

- Mette Frederiksen verður forkvinna í Javnaðarflokkinum, og hon fer í forsætisráðharrasessin beinan vegin. 

Á fund við Merkel

Í dag hittir Helle Thorning-Schmidt týska samveldiskanslaran, Angelu Merkel. Hesin fundurin hevur aftur fingið ferð á gitingarnar um, at Thorning er á veg í eitt leiðarastarv í ES. 

Uffe Tang sigur, at í baklandinum í Javnaðarflokkinum syrgja tey ikki Thorning.

- Nógv javnaðarfólk hava leingi vónað, at hon fer at finna eitt gott starv uttanlands, sigur hann.