Makrelsemjan í skotska valstríðnum

Makrelsemjan millum Føroyar og ES verður nú óbeinleiðis drigin upp í valstríðið upp undir fólkaatkvøðuna um sjálvstýri í Skotlandi í heyst.

Richard Lochhead, fiskimálaráðharri i í Skotlandi, og bretski starvbróðirin, George Eustice, eru ójavnir á máli um, hvør kós fer at tryggja skotsku fiskivinnuna best. Teir hava báðir svarað einum brævi frá skotska fiskimannafelagnum, sum bað ráðharrarnar um viðmerkingar til sjálvstýrismálið. 

Sjálvstýri einasta gongda leiðin

Richard Lochhead sigur, at sjálvstýrisleiðin er einasta gongda leið at tryggja kvotur og fiskiídnaðin í Skotlandi í framtíðini.

George Eustice sigur hinvegin, at Skotland sum partur av einum av størstu limalondunum í ES, hevur havt fyrimunir, og at bretskir ráðharrar gjøgnum ES m.a. hava verið við til at gera avtalu við Noreg og Føroyar um makrelfiskiskapin, sum eisini fær týdning fyri skotar.

Richard Lochhead sigur tvørturímóti, at bretska avgerðin um, at ES-fiskivinnupolitikkurin eisini skal fata um Skotland, hevur verið til óbótaligan skaða fyri skotsku fiskivinnuna.