Fleiri loyvi í dag og í morgin

Aftur í dag og í morgin skrivar Vørn loyvi at fiska makrel. 

Higartil hava nótaskipini fingið loyvi at fiska makrel, og ísfiskatrolararnir í bólki tvey fingu síni loyvi í gjár.

Hini loyvini verða skrivað í dag og í morgin, verður upplýst á Vørn, sum nú umsitur makrelloyvini. Fyrr umsat Fiskimálaráðið loyviin. 

Higartil í ár hevur einki móttøkuskip søkt um loyvi at keypa og virka makrel, men onkur umsókn er komin um at taka í móti makreli á feltinum og sigla hann til lands.

Nótaskipini kunnu fiska nú, men onnur sleppa ikki at byrja fyrr enn mánadagin 21.juli.

Nú er ikki neyðugt hjá skipunum at fiska makrelin, meðan hann er í føroyskum sjógvi, tí avtalan millum strandarlondini um makrelfiskiskapin loyvir skipunum eisini at fiska makrel í norskum sjógvi, ES sjógvi og í altjóða sjógvi.

Tað gevur skipunum høvi til at fiska makrelin, tá hann er bestur.

Føroyska makrelkvotan er knappliga 160.000 tons í ár.