Aling flytur skip

Ein nýggj siglingarleið inn á Skálafjørðin ger, at til ber at hava aling fram við Neslandinum út móti Eystnesi.

Við verandi siglingarleið ber ikki til at fáa líkinda aliøki fram við Neslandinum, stendur í ársfrágreiðingini hjá Landsverki.

Landsverk hevur ráðført seg við Søfartsstyrelsen og Kongshavnar havn í Runavík um eina nýggja siglingarleið longri frá Neslandinum.

Ein ætlan er nú gjørd. Ljósvinklarnir á vitanum á Toftum suðureftir verða sløktir. Í staðin fyri verður nýggjur vinkulviti settur upp á Strondum til at marka siglingarleiðina.

Heilsufrøðiliga starvsstova hevur fingið umsókn um aling við Nes. 

Bátar sleppa innanfyri  

Siglingarleiðin skal tó broytast fyrst, áðrenn aling kann verða loyvd fram við Neslandinum. Men bátar eiga tó at kunna sigla millum alibrúkið og land.

Landsverk skrivar í ársfrágreiðingini, at nýggja siglingarleiðin inn á Skálafjørðin hevur verið til hoyringar hjá havnamyndugleikum, kommunum, loðsbólkinum, Sjóvinnustýrinum og Vørn.

Hoyringarsvarini eru tó ikki við í ársfrágreiðingini.

Eisini í Sørvági

Aling krevur eisini, at siglingarleiðin á Sørvágsfirði verður flutt nakað. Har verða tveir nýggir vitar settir upp og ein gamal sløktur.

Orsøkin er, at alingin á Sørvágsfirði skal flytast longur út á fjørðin og til suðursíðuna.

Eins og á Skálafjørðinum fara smábátar tó framvegis at kunna sigla millum land og alistøðina.