Avstralia strikar CO2-avgjaldið

Avstralia verður fyrsta land, sum strikar CO2-avgjaldið.

Meiriluti í senatinum hevur samtykt at strika avgjaldið, sum avstralskir politikkarar hava kjakast um í fleiri ár. 39 limir í senatinum atkvøddu fyri og 32 í móti.

Avgerðin ávirkar umleið 350 fyritøkur í Avstralia.

Brúkarin fær rokningina

Tey, sum hava havt mest CO2-útlát, hava rindað 24 avstralskir dollarar fyri tonsið útlátnum kolevni. Endamálið við avgjaldinum var at gera fyritøkurnar umhvørvisvinarligari.

Avstralska stjórnin hjá Tony Abbott, forsætisráðharra, hevur stríðst fyri at strika avgjaldið, tí tað er brúkarin í síðsta enda, ið skal rinda rokningina.

Tony Abbott sigur, at verður avgjaldið strikað, spara avstralsku húsarhaldini 550 dollarar um árið, og tað er góð tíðindi fyri avstralskar familjur og smærri fyritøkur í landinum.

Avstralia verður útskot

Men ikki øll eru fegin. Leiðarin fyri Grøna Flokkinum, Christine Milne, sigur, at Avstralia verður nú útskot (paria) í altjóða høpi.

Bill Shorten úr Labour-flokkinum sigur, at avgerðin er pínlig fyri landið: - Tony Abbott skumpar Avstrala aftureftir, meðan allur heimurin fer seg frameftir.

Avstralia er millum heimsins lond við mesta CO2-útlát fyri hvørt fólkið, skrivar Ritzau-tíðindastovan.