Fyrra hálvár royndist væl hjá landskassanum

Fyrra hálvár eru inntøkurnar hjá landinum frá meirvirðisgjaldi umleið 12 prosent hægri samanborið við sama tíðarskeið í fjør. Inntøkurnar frá landsskattinum eru umleið seks prosent hægri enn somu tíð í fjør.

Í fíggjarlógini fyri 2014 er innroknaður væntaður vøkstur í mun til í fjør, men eisini í mun til fíggjarlógina eru inntøkurnar frá meirvirðisgjaldi og landsskatti hægri.

Heldur verandi gongd fram, tað ið eftir er av árinum, verða inntøkurnar hjá landskassanum frá meirvirðisgjaldi og landsskatti umleið 150 milliónir krónur hægri, enn sett er í fíggjarlógina fyri í ár, verður sagt í Fíggjarmálaráðnum.