Norðmenn ætla at selja sild í Føroyum

Norðmenn umhugsa nú at landa og virka sín fisk í Føroyum, og síðani at selja hann til Russlands.

Tað sigur Per Magne Eggesbø, stjóri á norska Vartdal Seafood, við Dagens Næringsliv.

Russland hevur sett innflutningsbann fyri fiski úr millum annað Norra og ES. Hetta kemur norðmonnum dátt við, tí áleið 20 prosent av norska sildaútflutninginum fór til Russlands.

Norska fiskivinnan ætlar nú at sleppa inn á russiska marknaðin kortini. Stjórin á norska Vartdal Seafood sigur ein møguleika verða, at norski fiskurin verður landaður í Føroyum og seldur Russlandi sum føroysk vøra.

- Inntøkurnar eru avgerandi fyri okkara virksemi, ásannar hann.

Taka ikki undir við ætlanini

Norska fyritøkan Pelagia, sum er millum størstu fiskaútvegarar í Evropa, tekur als ikki undir við hesum leistinum. Stjórin, Egil Magne Haugstad, vísir á, at orsøkin til innflutningsbannið er spenta støðan millum Russland og Ukraina. Norra stendur vanliga saman við vesturheiminum í krígsstøðu, og tað skal ikki broytast nú, heldur hann.

Hann væntar, at myndugleikararnir taka neyðugu stigini, um norska fiskivinnan fer at gera sær dælt av støðuni.

Men hann er kortini sannførdur um, at tað ber til hjá norðmonnum at flyta fisk til Russlands við Føroyum sum miðstøð.

- Russland er eitt korrupt land, og tað ber helst til at innflyta tað, sum russar vilja hava, sigur hann.