Vænta skrivliga váttan í morgin

Landsstýrið fær helst í morgin skrivligu váttanina úr Russlandi, sum skal staðfesta, at Føroyar eru ikki fevndar av innflutningsbanninum í Russlandi. 

Uttanríkistænastan í Tinganesi hevur umvegis føroysku sendistovuna í Keypmananhavn fingið at vita frá russisku sendistovuni í Keypmannahavn, at skrivliga váttanin er klár í morgin. 

Tað sigur Gunnar Holm Jacobsen, deildarstjóri í Uttanríkistænastuni í dag. 

Ivi um støðu Føroya

Tað var týsdagin í farnu viku, at føroyingar fingu munnliga váttan fyri, at bannið hjá Russlandi ikki fevnir um Føroyar. 

Ivi var um støðu Føroya, tí Russland hevur bannað innfluttningi úr ES. Føroyar eru partur av danska ríkinum, og Danmark er limur í ES.  Men føroyskir myndugleikar hava fingið váttan fyri, at bannið fevnir ikki um Føroyar, og skrivliga váttanin er nú á veg.

Tað hevur stóran týdning fyri føroysku vinnuna at fáa hesa váttan skrivliga, tí signalini frá kundum úr Russlandi hava higartil verið ógvuliga ymisk.