Formansskapur vil ikki vita av rokning

<p>Órógv er nú í formansskapinum á løgtingi um samsýningina, sum kanningarstjórin í Eysturoyartunnilsmálinum krevur at fáa fyri tað arbeiðið, hann gjørdi, áðrenn hann varð noyddur at leggja frá sær vegna rumbul um ógegni.</p>

<p>Anfinn Vitalis Hansen hevur allatíðina hildið uppá, at hann var gegnigur, og málið um hansara gegni hevur ikki verið roynt við hægri stovn í Danmark, hjá Advokatsamfelagnum, sum eisini er eftirlitsmyndugleiki hjá føroyskum advokatum.</p>

<p>11. januar - dagin eftir, at hann ikki longur var kanningarstjóri - tvíhelt&nbsp;Anfinn Vitalis Hansen í samrøðu við útvarpið um, at hann var gegnigur, og segði í sama viðfangi, at hann sjalvandi helt seg hava rætt til at fáa samsýning fyri tær útreiðslur, sum hann hevði havt til tá.</p>

<p>Síðani hevur&nbsp;advokaturin sent tinginum rokning fyri teir góðu tveir mánaðirnar, hann hevur arbeitt sum kanningarstjóri. Men í formansskapinum vilja tey ikki vita av hesi rokningini.</p>

<p><strong>Løgtingslimir vísa á&nbsp;ógegni</strong></p>

<p>Heimasíðan <a href="http://www.in.fo/news-detail/news/loegtingsformadurin-einsamallur-vid-ro... target="_blank">in.fo</a> endurgevur bæði Alfred Olsen og Gerhard Lognberg úr formansskapinum fyri at vísa til inhabilitet sum grundgeving fyri, at teir ikki vilja rinda rokningina til Anfinn Vitalis Hansen.</p>

<p>Páll á Reynatúgvu situr eisini í formansskapinum hjá løgtinginum. Hann vísir somuleiðis til ógegni um grund fyri ikki at rinda rokningina. Tað hevur ikki eydnast útvarpinum at fáa viðmerking frá Jógvani á Lakjuni, løgtingsformanni.</p>

<p>Súsanna Danielsen, stjóri á løgtingsskrivstovuni sigur í stuttari viðmerking, at tað í síðsta enda er tingformaðurin, sum setir kanningarstjóran, sum skal góðkenna slíka rokning.</p>

<p>Løgtingið hevur ikki sent málið um gegnið hjá Anfinni Vitalis Hansen til metingar hjá eftirlitsmyndugleikanum í Danmark og hevur tískil ongan úrskurð frá hægri stovni at vísa á.</p>