Forkeypsrættur til partabrøv endaði í løgtinginum

Tá bankastjórar fáa partabrævaopsjónir kann bankin fara at átaka sær størri váða og stýra stuttskygdari, so kursurin á Partabrøvunum er høgur júst tann dagin, bankastjórarnir kunnu brúka forkeypsrætt sín og keypa partabrøv í bankanum fyri lægri kurs enn tann, sum annars er galdandi tá.

Nógv meta, at júst hesin mátin at løna bankastjórum var ein av fleiri orsøkum til, at fíggjarkreppan í 2008 gjørdist so ógvuslig. 

Tað sigur Kristina Háfoss, løgtingskvinna í Tjóðveldi, sum á tingfundinum mikudagin fer at spyrja Jørgen Niclasen, landsstýrismann, um partabrævaopsjónirnar, sum stjórarnir í BankNordik fingu mánadagin.

Forkeypsrætt sum løn

Landið eigur, gjøgnum Fíggingargrunnin, framvegis triðingin av BankNordik.

Janus Petersen, forstjóri, og John Rajani, stjóri, fingu tilsamans 46.619 partabrævaopsjónir mánadagin. 

Kursurin er 112,90 fyri hvørt partabrævið. Tað er miðalkursurin hjá partabrævinum í BankNordik teir fimm søludagarnar fyri 1.september.

Frá 10.august til 10.desember í 2018 kunnu bankastjórarnir so keypa partabrøvini fyri kursin 112,90, sama hvør kursur annars er galdandi tá.

Kann gerast kubb

Tá slíkur forkeypsrættur til partabrøv verður brúktur, kann hann gerast ein stórur vinningur hjá tí, sum eigur rættin. Tað er um kursurin er nógv hægri tá enn hann var, tá forkeypsrætturin varð latin.

Er kursurin eitt nú 150 og forkeypsrætturin til dømis sigur 112,90, kunnu partabrøv keypast fyri 112,90 kr. og seljast aftur fyri 150 krónur.    

Góðkent á aðalfundi

Aðalfundurin hjá BankNordik hevur góðkent, at nevndin gevur stjórunum báðum partabrævaopsjónir sum part av lønini.

Kristina Háfoss fer at spyrja Jørgen Niclasen, um hann ella Fíggingargrunnurin hava tikið undir við, at partabrævaopsjónir verða partur av lønini hjá stjórum í føroyskum banka.