Kjak um handilssambond og moral

Tað vakti ans, tá tað frættist, at Kaj Leo Holm Johannesen, løgmaður, fríggjadagin var á veg til Russlands at tryggja okkum útflutningsrættindi, eftir at Russland setti innflutningsbann á vørur úr ES, Noregi og USA fyri góðum mánaði síðani. 

Støðan millum Russland og vesturheimin hevur ikki verið so spent síðani kalda kríggið, í kjalarvørrinum av kreppuni í Ukraina. Og samstundis sum løgmaður var í Moskva, var Nato-toppfundur í Wales.

Kjakið eftir Dag og Viku í kvøld verður um altjóða handilssambond, moral - og ikki minst timing.

Í sjónvarpsstovuni vera Sjúrður Skaale, fólkatingsmaður fyri Javnaðarflokkin, og Helgi Abrahamsen, løgtingsmaður fyri Sambandsflokkin. Liljan Weihe er vertur.