Eldraøkið: Fíggingarleisturin lagdur fyri tingið

Lógirnar, sum skulu tryggja kommununum fígging, tá tær taka við eldraøkinum á nýggjárinum, eru nú komnar á tingborð.

Jørgen Niclasen, landsstýrismaður, skjýtur upp, at kommunurnar fáa inntøkurnar av pensjónskattinum, og at tær eina ferð um árið fáa goldið eina upphædd úr landskassanum, sum svarar til skattavirðið á ávísum frádráttum í DIS og FAS, fiskimannafrádráttinum og uttanlandsfrádráttinum. 

Fíggjarmálaráðið sigur, at fíggjarligu avleiðingarnar fyri kommunurnar vera ymiskar, tá tær taka við eldraøkinum. Flestu kommunur fáa eina upphædd, sum er størri enn kostnaðurin, men einstakar kommunur fáa eina minni upphædd, enn kostnaðurin væntandi verður. 

Tí fáa kommunurnar endurgjald fyri miss, sum tær hava havt av DIS, FAS, fiskimannafrádrátti og uttanlandsfrádrátti.

Tá ið ræður um eftirlønarskattin, fáa kommunur, har nógvir eldri borgarar eru, ein lutfalsliga størri part av upphæddini. Lagt verður eitt nú uppfyri, at Sandoyggin verður rikin sum eitt øki fyri seg.

Lógaruppskotini um, hvussu kommurnar skulu fíggja eldraøkið, fáa fyrstu viðgerð í tinginum fríggjadagin