Landsstýrið vil hava rentustuðulin at lækka

Løgtingið skal taka støðu til, um sethúsaeigarar skulu missa nakað av rentustuðlinum.

Jørgen Niclasen, landsstýrismaður í fíggjarmálum, hevur lagt uppskot fyri løgtingið, har hann mælir til at lækka rentustuðulin við einum prosentstigi um árið, næstu fimm árini. Rentustuðulin er í dag 35 prosent og skal eftir ætlan vera 30 prosent í 2019. 

Hvørja lagnu uppskotið fær í løgtinginum, er óvist. Løgtingið viðgjørdi sama spurning í fjør, men tá fall uppskotið. Ein samd fíggjarnevnd strikaði hendan partin av uppskotinum.
  
Tá var tó samtykt at lækka hámarkið stigvíst úr 115.000 kr til 100.000 kr. næstu árini.

Uppskotið at lækka rentustuðulin er lagt fyri løgtingið saman við fíggjarlógaruppskotinum í royndini at venda hallinum á fíggjarlógini til yvirskot í 2016. 

Verður tað samtykt, sparir løgtingið 2,5 milliónir krónur í rentustuðli í 2015 og 12,5 mió. í 2019.

Tey, sum skylda tvær milliónir krónur í sethúsunum við eini rentu á 4 prosent, missa 804 krónur um árið í rentustuðli, verður umskotið samtykt.