Minna landsstýrismannin á at lækka prísir hjá SSL

Nú eigur landsstýrismaðurin í vinnumálum at lækka ferðaseðlaprísirnar hjá Strandferðsluni.

Tað heldur Fíggjarnevndin hjá løgtinginum, sum minnir landsstýrismannin á, at hálv onnur millión krónur er í fíggjarlógini til júst hetta endamálið, at lækka prísirnar.

Í álitinum um uppskotið hjá landsstýrinum um eykajáttanir ger ein samd Fíggjarnevnd vart við, at í fíggjarlógini fyri 2014 er sett av hálv onnur millión til at lækka prísir á ferðaseðlum, og væntar nevndin at landsstýrismaðurin setur hetta í verk sum skjótast.

Minnilutin

Minnilutin í Fíggjarnevndini, Tjóðveldi og Javnaðarflokkurin, vil ikki taka 800.000 kr. av játtanini til at umvæla almennar bygningar, og minnilutin vil heldur ikki taka 200.000 kr. frá Útlendingastovuni, men brúka pengarnar til  integratiónspolitikk. 

Harafturat vil minnilutin heldur ikki lækka játtanina til barnaískoyti.