Seta bæði kærir og stevnir Løgmansskrivstovuni

Partafelagið Seta, sum eigur garnaskipið Anitu, letur sær ikki lynda, at løgmaður hevur tikið loyvini at fiska FRÁ Anitu.

Sakførarin hjá felagnum, Jens Andrias Vinther, er í ferð við at skriva stevning, har hann fer at krevja, at landsstýrið og Løgmansskrivstovan verða dømd at viðganga, at avgerðin um veiðiloyvið er tikin av órøttum.

Eisini verður endurgjaldskrav við í stevningini. Hvussu stórt tað verður, ber ikki til at siga enn.

Kært til Umboðsmannin 

Jens Andrias Vinther sigur, at hann hevur longu sent Løgtingsins umboðsmanni kæru um gegnið hjá Løgmansskrivstovuni at taka avgerðina um Anitu.

Jens Andrias Vinther sigur, at Løgmansskrivstovan var ógegnig at taka avgerðina, tí longu áðrenn hoyringarfreistin um ætlanarskrivið um at taka veiðiloyvið var farin, segði løgmaður í Degi og Viku, at Anita fór at missa loyvið

Tí áttu løgmaður og Løgmansskrivstovan at víst málsviðgerðini til annan myndugleika, sigur sakførarin hjá P/f Seta.