Vilja bøta um orðaskiftið á tingi

Poul Michelsen, Aksel V. Johannesen, Kristianna Winther Poulsen og Høgni Hoydal skjóta upp, at uppskotssetari kann fáa orðið í fimm minuttir, áðrenn framsøgufólkini fáa tað.

Í viðmerkingunum sigur andstøðan, at skrivaði teksturin í einum løgtingsuppskoti er minni enn so altíð somikið greiður, at hann einsamallur er nøktandi grundarlag undir sakligari viðgerð og støðutakan.

Hetta kann elva til nógvar misskiljingar undir eini viðgerð av einum máli, og at viðgerðin tí fer av
sporinum, siga tey. 

Andstøðuflokkarnir halda, at hetta serliga ger seg galdandi, tá løgmaður ella landsstýrisfólk leggja uppskot fyri tingið, tí tey fáa ikki orðið, fyrr enn framsøgufólkini hava havt tað. Tað ber til at bøta um hetta, um uppskotssetarin sleppur at lýsa málið nágreiniligari tíðliga í viðgerðini og helst, áðrenn framsøgufólkini fáa orðið, siga altso Poul Michelsen, Aksel V. Johannesen, Høgni Hoydal og Kristianna Winther Poulsen.

Fyrsta viðgerð av uppskotinum um at broyta tingskipanina verður nú týsdagin.