Tveittu fisk útaftur: Blágumma kann ikki etast

Tað var blágumma, sum fór fyri borð aftur, tá norska fiskiveiðieftirlitið kannaði føroyska verksmiðjutrolaran Akraberg týsdagin.

Blágumma er fiskur, sum ikki kann brúkast, tí eingin matur er í henni.

Anfinn Olsen, reiðari á Akrabergi, sigur, at norðmenn tosa um trý sløg av steinbíti, steinbit, sum er steinbítur, flekksteinbit, sum er liri á føroyskum, teir verða frystir á Akrabergi, og so er blåsteinbit, sum er blágumma á føroyskum. Hana hava føroysk skip altíð tveitt fyri borð, tí hon kann ikki brúkast til nakað.

Men nú er blágumma komin á ein norskan lista við fiskasløgum, sum ikki mugu blakast fyri borð.

Sambært norska fiskiveiðieftirlitinum fóru nakrir toskar eisini fyri borð. Anfinn Olsen sigur, at hetta vóru skræddir toksar.  

Anfinn Olsen veit ikki, um málið endar í rættinum.

Týsdagin meldaði norska fiskiveiðieftirlitið Akraberg til politiið fyri at blaka fisk fyri borð, skrivar Fiskaren.
Reiðaríið hjá Akrabergi hevur veitt bankatrygd fyri konfiskasjón, 450.000 norskar krónur, slakar 380.000 danskar, og bótina hjá skiparanum, 30.000 kr., 25.000 danskar. 
Eftir tað slapp Akraberg at halda fram við fiskiskapinum í norskum sjógvi.