G! 2026: Jóhannes Steingrund hevur tryggjað ljóðið øll árini

Jóhannes Steingrund hevur verið partur av tekniska toyminum á G! øll árini.

Hann er í dag eigari og stjóri í fyritøkuni Steingrund Akustik, sum saman við einum stórum tekniskum toymi syrgir fyri, at tónleikurin á festivalinum ljóðar, sum hann skal.

Steingrund.png

Jóhannes Steingrund, eigari og stjóri, Steingrund Akustik

Í ár telur tekniska toymið eini 30 fólk. Tey eru býtt út á teir tríggjar pallarnar, sum eru á sandinum, á spæliplássinum og í fjósinum. Harumframt tekur tekniskatoymið sær av smærri tekniskum uppgávum, eitt nú diskotekið sum var á tjaldingarøkinum mikukvøldið.

Europe var hæddarpunktið

Nógvir tónleikarar og bólkar hava staðið á pallinum á G! gjøgnum árini. Men serliga ein framførsla stendur eftir í minninum hjá Jóhannesi.

– Hæddarpunktið var helst, tá Europe spældi í 2005. Tá miksaði eg monitorljóðið hjá teimum, og tað var øgiliga stórt, sigur hann.

Monitorljóðið er tað ljóðið, sum tónleikararnir sjálvir hoyra á pallinum. Tað er avgerandi fyri, at teir hoyra bæði seg sjálvar og hinar tónleikararnar, meðan teir spæla.

Brimið gjørdi pallin óbrúkiligan

Tað eru tó ikki bara góðu tónleikaligu upplivingarnar, sum Jóhannes minnist aftur á.

Ein av størstu avbjóðingunum var í 2010, tá brimið gjørdi, at pallurin á sandinum gjørdist skeivur og ikki kundi brúkast.

– Vit máttu finna eina skjóta loysn og seta ein nýggjan pall upp á asfaltinum. Spæliplássið gjørdist knappliga størsti pallurin, sigur Jóhannes.

Broytingin hevði við sær, at bæði útgerð og tónleikarar máttu flytast millum pallarnar við sera stuttum skotbrái.

– Orkestrini máttu flytast av sandinum niðan á spæliplássið og av spæliplássinum oman á hin pallin. Tað var eitt øgiligt roks, sigur hann.

Hóast nógv er broytt, síðan G! fyrstu ferð varð hildið, er uppgávan hjá Jóhannesi og tekniska toyminum framvegis tann sama: 
At tryggja, at bæði tónleikarar og festivalgestir fáa eina góða ljóðuppliving.