Venjingardysturin er endaður sum løgreglumál

Venjingardysturin millum HB og Víking í gjárkvøldið varð steðgaður, tá Hans Jørgen Djurhuus hjá Víkingi gav Poul Ingason hjá HB ein framaná.

Seinni varð staðfest, at Poul Ingason hevði brotið nøsina.

Eingin hevur meldað tilburðin, men løgreglan hevur sjálv valt at taka málið upp.

-Løgreglan hevur tikið hetta málið upp, tí tað er harðskapur sum fer fram í tí almenna rúminum, sigur Jón Kruse, løgreglumaður, við Útvarpið.

Hóast tilburðurin fór fram á einum fótbóltsvølli, so verður tað viðgjørt sum onnur harðskapsmál, sigur Jón Kruse.

Løgreglan fer nú at avhoyra vitni, ið vóru tilstaðar, tá tilburðurin fór fram.

Leikarar, venjarar, áskoðarar og dómari skulu avhoyrast.

Ákæruvaldið skal síðani gera av, um harðskapsmál skal reisast.