Dimmalætting hevur kært Fiskimálaráðið

<p>Dimmalætting hevur kært Fiskimálaráðið til Løgtingsins umboðsmann. Í oddagreinini í blaðnum seinasta fríggjadag stendur, at Dimmalætting spurdi Fiskimálaráðið um útlendskan ognarrætt í føroysku fiskivinnuni.</p>

<p>Í lógini um vinnuligan fiskiskap stendur, at Fiskimálaráðið eigur at fáa boð um allar útlendingar, sum eiga í føroyska fiskiflotanum. Dimmalætting bað tí um innlit í hesar upplýsingar.</p>

<p>Dimmalætting spurdi Fiskimálaráðið, hvørjir útlendingar eiga í føroyskum fiskivinnufeløgum, og hvussu nógv, teir eiga. Men tað bar ikki til at fáa at vita.</p>

<p><strong>Dimmalætting góðtekur ikki svar</strong></p>

<p>Dimmalætting skrivar, at Fiskimálaráðið segði seg hava upplýsingarnar, men tær eru í hvørjum einstøkum máli. Einki heildaryvirlit er til.</p>

<p>Sambært Dimmalætting svaraði Fiskimálaráðið, at tað fór ikki at brúka orku til at gera eitt tílíkt heildaryvirlit. Hetta svarið góðtekur Dimmalætting ikki, og hevur tí kært Fiskimálaráðið til Løgtingsins umboðsmann.</p>

<p>Løgtingsins umboðsmaður hevur longu eitt annað mál, sum líkist nógv tí hjá Dimmalætting. Kært varð um, at ikki bar til at fáa at vita frá Fiskimálaráðnum, hvørji veiðiloyvi eru í føroyska fiskiflotanum.</p>

<p>Svarið var tað sama, sum Dimmalætting fekk: einki heildaryvirlit finst, tí veiðiloyvini liggja í hvørjum einstøkum máli. Men eftir at Løgtingsins umboðsmaður vendi sær til Fiskimálaráðið, skuldi ráðið fáa øll veiðiloyvini í eitt heildaryvirlit.</p>