Grunnabarð komin á Skála

Grunnabarð fór at leka í maskinrúminum seinnapartin mánadagin. Tá var skipið á veg á fiskileið.

Grunnabarð og Beinisvørð skuldu samtrola eftir makreli í ES-sjógvi. 

Fyri veður og myrkur bar ikki til at fáa tyrluna hjá Atlantic Airways til hjálpar, men har vóru onnur skip á leiðini, sum komu til hjálpar. Tey vóru Beinisvørð og Kúrberg. 

Grunnabarð kláraði ikki at halda lens, men trý korter eftir at lekin varð staðfestur var fyrsta pumpan av Beinisvørði komin um borð á Grunnabarð. 

Langt var hjá Brimli at sigla, so MRCC vildi hava størri og betur útgjørt skip á staðið og bað tí Fagraberg um at fara Grunnabarði til hjálpar. Tá fekk Grunnabarð fleiri pumpur umborð. Sjógvur kom nú ikki longur upp á motorin.

Stutt fyri midnátt mánakvøldið var Brimil hjá Grunnabarði, og tey bæði skipini umframt Beinisvørð og Kúrberg settu kós móti Føroyum. 

Tey vóru tá 60 fjórðingar í útsynning sunnan úr Akrabergi. Ferðin var lítil, fýra-fimm fjórðingar, tí girið hjá Grunnabarði gjørdist ov heitt, upplýsir Sjóbjargingarstøðin, MRCC.