Kringvarpið strikar kjakbólk á Facebook

Leiðslan í Kringvarpi Føroya hevur gjørt av at strika bólkin á Facebook undir navninum Kringvarp Føroya. 

Leiðslan í Kringvarpi Føroya hevur í longri tíð fingið klagur um viðferð av bæði starvfólkum í Kringvarpinum og øðrum, sum brúka henda bólkin. 

Kringvarp Føroya varar ikki formelt av hesum bólki, og tí verður bólkurin nú strikaður, sigur leiðslan. 

Bólkurin er kærdur til Fjølmiðlanevndina og til løgtingsins umboðsmann. 

Løgtingsins umboðsmaður hevur enn ikki viðgjørt klaguna, men Fjølmiðlanevndin er komin við sínum úrskurði. 

Fjølmiðlanevndin sigur millum annað, at um hugt verður eftir orsøkini til kæruna, er tað uttan iva óheppið, at persónur, sum luttekur í sending o.a hjá KVF, verður viðgjørdur í facebookbólkinum á tann hátt, sum gjørt verður í hesum máli.

Tað má tí vera uppgávan hjá og í áhugamálinum hjá KVF at handfara hetta mál víðari. 

Leiðslan í Kringvarpi Føroya virðir úrskurðin hjá Fjølmiðlanevndini og hevur tikið avgerð um at strika bólkin. 

Kringvarp Føroya hevur tó ein almennan vanga á Facebook, og navnið er tað sama - Kringvarp Føroya.