Royna at loysa trætu

Talan er um samsýningina, sum pedagogar skulu hava, tá tey eru vegleiðarar hjá teimum, sum eru í starvsvenjing. Avtalan varð gjørd fyri okkurt um 30 árum síðani.

Pedagogfelagið segði avtaluna upp í heyst, tí tað vil hava hana dagførda. Avtalan fór úr gildi 1.mars. Síðani hava samráðingar verið um nýggja avtalu millum Pedagogfelagið og Lønardeildina, men samráðingarnar bóru ikki á mál.

Tí sendu partarnir boð eftir Semingsstovninum. Terji Sigurðsson, semingsmaður, segði við Útvarpið leygardagin, at hann hevur havt nakrar fundir við partarnar, og næsti fundur verður í dag.