- Tíðindi, mentan og ítróttur
Fara nú í Gerðarrættin við lønarkravinum
![](https://kvf.fo/sites/default/files/styles/grein-ovasta-mynd/public/6698b5c43029fcf22524f68fcccda807.png?itok=g-JpVska)
Ósemja tók seg upp millum manningarfeløgini og Lønardeildina í Fíggjarmálaráðnum stutt fyri jól, tí manningarfeløgini noktaðu limum sínum at sigla jóladag, tí ongin semja var um lønina fyri siglingina.
Manningarfeløgini kravdu at fáa 100 prosent yvritíðarsamsýning fyri fullan arbeiðsdag, men tað vildi Lønardeildin ikki.
Málið um arbeiðssteðgin varð beint í Gerðarrættin, sum gjørdi av, at arbeiðið kundi ikki leggjast niður, men avgerðin hjá Gerðarættinum segði onki um, hvørja samsýning starvsólkini skulu hava. Guðrið Joensen, gerðarrættardómari, segði tó, at partarnir kunnu senda spurningin um yvirtíðarsamsýningina til Gerðarættin sum tulkingarmál.
Hava samráðst
Og tað hava manningarfeløgini boðað frá, at tey ætla sær at gera. Men málið er ikki farið í Gerðarættin enn, millum annað tí at samráðingar síðani hava verið millum Lønardeildina og feløgini.
Anfinnur Garðalíð, formaður í Skipara- og Navigatørfelagnum, sigur, at úrskurðurin hjá Gerðarættinum kann verða ein vansi fyri manningarfeløgini í sáttmálasamráðingum, sum verða næsta ár, um Gerðarætturin staðfestir, at starvsfólkini hjá Strandferðsluni ikki eiga at fáa 100 prosent yvirtíðarsamsýning fyri fullan arbeiðsdag halgidagar.
- Vit hava roynt at fingið semju í lag um lønina við Lønardeildina, men eru ikki komnir á mál enn, og tí beina vit nú málið í gerðarættin, sigur Anfinnur Garðalíð.