Fleiri vørur blivnar bíligari

Frá fyrsta ársfjórðingi í fjør til fyrsta ársfjórðing í ár er brúkaraprístalið lækkað 1,6 prosent. Príslækkingar á brennievni hava ávirkað brúkaraprístalið mest hetta seinasta árið.

Hagstovan hevur gjørt upp, at í nýtslubólkinum "Býli" er prísurin á brenniolju til húsarhald farin 18,9 prosent niður. Rentan á íbúðalánum er eisini lækkað, og samanlagt er býliskostnaðurin minkaður 7 prosent.

Í nýtslubólkinum "Flutningur" eru prísirnir á brennievni til akfør lækkaðir 16,5 prosent, og samanlagt er flutningskostnaðurin farin 2,1 prosent niður.

Prísfall í fleiri øðrum bólkum eisini

Prísfall hevur eisini verið í fleiri øðrum nýtslubólkum. Í bólkinum "ymiskar vørur og tænastur" eru prísirnir lækkaðir 2,3 prosent, tí barnagarðspláss eru vorðin bíligari.

Prísirnir á innbúgvi og húsbúnaði lækkaðu 1,7 prosent. Størsti prísvøksturin - 2 prosent - hevur verið innan samskifti. Tað eru postgjøld, sum eru hækkað.

Prísirnir á mati og drekka - samanlagt - hava at kalla staðið í stað seinasta árið, sambært nýggju tølunum hjá Hagstovu Føroya.