SSL eigur at hava sítt egna avloysaraskip

Strandfaraskip landsins eiga at hava sítt egna avloysaraskip til útoyggjarnar, so sleppast kann undan at leiga skip hvørja ferð, strandfaraskipini skulu á beding, heldur Johan Dahl, landsstýrismaður.

Eitt slíkt skip kann fáast fyri sjey til níggju milliónir krónur, sigur landsstýrismaðurin í svari til Høgna Hoydal, løgtingsmann.

Tað hevði borið til at fíggja avloysaraskipið við pengunum, sum nú verða brúktir til at leiga skip at avloysa strandfaraskipini.

Høgni Hoydal spurdi, hví Jósup, sum vanliga siglir til Mykinesar, varð fluttur til Svínoyar-Fuglaoyarleiðina.

Jósup sigldi fyri Rituna, meðan hon var á beding fyrru helvtina av mai.

Strandfaraskip landsins fingu tvey tilboð upp á siglingina hjá Rituni. Annað tilboðið var 10.000 kr. um dagin, tað var Jósup, hitt tilboðið var 13.000 kr., upplýsir Johan Dahl.