- Tíðindi, mentan og ítróttur
Ritan aftur í sigling fríggjamorgunin
![](https://kvf.fo/sites/default/files/styles/grein-ovasta-mynd/public/0fcb5ca2ba34971b96069ddd7709bb86.png?itok=xlwlxSPd)
Strandfaraskipið Ritan fer aftur í sigling til Svínoyar og Fugloyar fríggjamorgunin.
Seinastu vikurnar hevur Ritan verið á sleipistøð í Havn, og ætlanin var at hon skuldi fara í sigling aftur hálvan mai. Men tað hevur drigið út við arbeiðinum, og tí er skipið seinkað.
Ritan er flotað aftur, og tað, sum er gjørt, verður roynt, áðrenn hon fer aftur í sigling í Norðoyggjum.
Jens Petur Brattalíð, ferðslusamskipari hjá Strandferðsluni, sigur, at fitt av farmi liggur í Norðdepli, sum skal flytast til Svínoyar og Fugloyar, m.a. einar hálvthundrað tunnur av olju.
Jósup hevur røkt siglingina til Svínoyar og Fugloyar, meðan Ritan hevur verið á sleipistøð. Tá Ritan fer aftur í sigling, fer Jósup aftur at sigla til Mykines.
Hava leigað tvíkilju
Strandferðslan hevur leigað tvíkiljuna Kavaran í Vestmanna at sigla við farmi til Mykines.
Kavarin var í Mykinesi í dag við oljutunnum og øðrum farmi. Tann báturin er útgjørdur við krana, og tað ger arbeiðið munandi lættari. Tá Kavarin er í Mykinesi, tekur hann eisini burturkast frá húsarhaldunum við sær inn aftur á meginlandið. Ferðin í Mykinesi eydnaðist væl í dag, sigur Jens Petur Brattalíð.
Brynhild hevur røkt ferðafólkaflutningin til Mykines, meðan Jósup hevur loyst av í Norðoyggjum.
Fríggjadagin fer Jósup aftur at sigla til Mykinesar, og Brynhild gevst at sigla.
Tí skuldu øll viðurskifti verið fingin í rættlag fyri hvítusunnu, sigur Jens Petur Brattalíð, ferðslusamskipari.