Grein 19 nevndin liðug hálvan juni

Grein 19 nevndin, sum kannar viðurskiftini um EIK grunnin, fer at hava fund í dag. 

Joen Magnus Rasmussen, formaður í Grein 19 nevndini, sigur, at arbeiðið hjá nevndini higartil hevur gingið væl, men enn er nakað eftir á mál. 

Ætlanin var at grein 19 nevndin skuldi vera liðug við sítt abeiðið 1. juni, men tíðarætlanin fer ikki at halda.

Nú verður miðað eftir, at arbeiðið er liðugt um hálvan juni, sigur Joen Magnus Rasmussen. 

Á fundinum í dag fer nevndin at leggja arbeiðið til rættis fyri næstu vikurnar. 

Nevndin fer eisini at ganga ígjøgnum arbeiðið, sum higartil er gjørt.

Joen Magnus Rasmussen sigur, at nevndin er liðug við allar hoyringar, og fer neyvan at kalla fleiri fólk inn. 

Umframt Joen Magnus Rasmussen, sum er formaður, eru eisini Kristina Háfoss og Helgi Abrahamsen í grein 19 nevndini.