Grikkaland noyðist úr evru-samstarvinum

Grikkar vilja ikki geva seg mótvegis hinum evrulondunum og altjóða valutagrunninum, IMF, og tí slepst neyvan undan, at landið noyðist úr samstarvinum um evruna, og má aftur at nýta gamla gjaldoyrað, drachma.

Bretska blaðið The Telegraph skrivar, at grikska stjórnin arbeiðir við at lata Grikkaland fara á húsagang eftir sama leisti, sum Ísland fór á húsagang.

Ætlanin er at tjóðartaka griksku bankarnar og peningarenslið í landinum. Hendir tað, so er Grikkaland ikki longur við í samstarvinum um evruna.

Einki nýtt uppskot

Grikski fíggjarmálaráðharrin sigur, at Grikkaland hevur einki nýtt uppskot um loysn í skjáttuni, tá fíggjarmálaráðharrarnir í ES hittast í morgin.

Týsk bløð skriva, at ES arbeiðir við eini serligari loysn, um eingin semja fæst á skuldarspurninginum hjá Grikkalandi í seinasta lagi um vikuskiftið.

Loysnin skal vera tann sama, sum Kypros noyddist at góðtaka í 2013, og tað er, at ES yvirtekur eftirlitið við peningakervinum í landinum.