Landsverk hevur ov lítið til viðlíkahald

Landsverk hevur alt ov lítið av pengum til at halda vegir, brýr og tunlar viðlíka.

Tað skrivar stovnurin í ársfrágreiðing sínari fyri 2014.

Tunlar krevja umvælingar fyri 187 mió. kr. og brýr fyri 40 milliónir. Og tá eru dagføringar ikki taldar við. 

Harafturat eru so landsvegirnir. Landsverk sigur, at 100 kilometrar, fimti hvør kilometur, krevja asfaltering. Eftirsleipið svarar til millum 80 og 100 mió. kr.

Útreiðslurnar í fíggjarlógini til raksturin hjá tí almenna eru vaksnar 113 prosent síðani 1996. 

Játtanin minkað 20 prosent

Samstundis er játtanin til Landsverk minkað 20 prosent, men ferðsluarbeiðið er vaksið okkurt um 23 prosent. 

Við øðrum orðum er gapið millum játtanartørv og eftirsleip alsamt vaksið, er niðurstøðan hjá Landsverki.

Ella, sagt við øðrum orðum og tølum: í 2014 vóru bara 80 oyru eftir av hvørjari krónu í 1996 til viðlíkahald.

Eftirsleipið svarar til fýra ferðir árligu játtanina til Landsverk. Í Danmark er hetta eftirsleipið 1,2, í Noregi 2,2, í Svøríki 2,5 og í Finnlandi 2,6, skrivar Landsverk í ársfrágreiðingini.